خدا    چي     بَكمِ /   زموُنهَ    پيرمِ

دِ     يَك   تيچسِيمِ  /  دِ  قووُموُ    ديرمِ

دِ    ني   دو   پيا /   ري  وِري   يَكبا

 يا   بَرد    بَشوُنهَ   /   يا   گُرز  وِ دَس با

آخمِ   سي    اوُسه / ديهَ     ناشتيمِ

جَنگ  وِ  چوُ   كِرديمِ  /  شاكي ناشتيمِ

نوُوِنمِ   سي  چي /  چَرخ  چني بيهَ

 هَمَش    تَقصير   ايي   /   جَعبهَ   رنگيهَ

نهَ  شوُ  نشيني /  نهَ  فال  چهل سروُ

 امروُ         زنيي    /     كُل     بيهَ    دِروُ

موُبايل   ماهوارهَ /   ماشينِ    پرايد

 ها روُمِ كافي نت / سي دي بَكمِ رايد

ها  پا   ماهوارهَ /  تا  سه   نصف  شوُ

 سرويس   اوُ مارَت   /   اوُ مِي كنهَ تووُ

حقوُقن  گريت  /  زينهَ     ايسهَ   شوُ

ها   روُوَن  جا    قسط /    بَكنهَ    بَرشوُ

حوُنهَ   صد  مترهَ /   بَچووُ  گَپ بينهَ

دَس   گيروُ   نارهَ  /   يَك   ترين  دينهَ

نهَ  كار  كيخواهي /   نهَ كَسي دوُنهَ

حتماً   چَت   كِردهَ   /   خدا  مِي دوُنهَ

هَمهَ    دانشجوُ /   خَرجيا   هم   بالا      

بوُوَش      كارگر   /        كِمَرش   دولا

فارغ  تَحصيل  بي  /  اوُ شُغلي نارهَ

بيكار   وُ   بَطال  /     وِ    پا     ماهوارهَ

قديم   مِي  گوُتن / كُر دِ پُونزهَ سال

دُختر   فرموُ     بَر  /   سن اوُ وِ نو سال

عروُسي       بَكنَ   /    خدا    كريمهَ

كُر   سي   چوُپوُني  / دُختر سي هيمهَ

كُريا   پا   دِ  چهل / دُختر سي وُ دو

هَر   روُز    قيشوُنهَ /    شاهد  من  وُ تو

نهار     ساندويچ  /      شوُمِ    فلافلهَ

چار  دِ   شوُ   حَردمِ /    سير   نيي  تِلهَ

آخمِ       چِزنَك /    رغوُ    حيووُني

بَشيني      وِ     پاش /     بَزني     زوُني

مَردمِ  سِيل كنيت /  وي  تكنوُلوُژي

كَسْ      دِ   نكارهَ   /   نُخهَ   وُ     نوُژي

آخمِ   سي    لُرغهَ /    اوُ  اَسبِ كالهَ

بهار   گُل    زرد    /   چي   دشت  لالهَ

نوشتمِ   طَنزي  /   سي      روُزگاروُ

اَر   عيبي    دارهَ   /    بوُويِت     بِراروُ

سلامِمِ     وِ     سوُارون     /          ايلِ  سَگوَن

دِ    اَول  دَشت  خوُزسوُ /  تا كُو اَلوَن

بِراروُ        تَعريف     بَكمِ    /   دي    سَرزمينمِ

رَسمِ   لُر  حماسيهَ   /    مَنهَ      دِ خينمِ

قديموُ   قَسمِ    حَردِن    /   وِ    تالِ      سوُلي

قيمتِ      اوُ   تال سوُل /  دُرَ    گروُني

سَگوَنيا   چي   تَش    بريق   /   دوُ    آسموُنهَ

اَجدادِش  سلَحشورهَ  /   دَس وِ كَموُنهَ

پيا   سَگوَن   هِي   دي   وِل   /  كه  پير  نبوُوهَ

هَر  آهنِ   ژَنگ   زيهَ  / شمشير نبوُوهَ

گُرِ  سوُل   تا   بُنِ   گوُش  /  ريش  وِ  سَرِ شال

نَشسهَ  وِ  قاچ  زي  / سوُار دَس  وِ يال

دِ كوُهسار هِي چي پلَنگ / چي  شير دِ بيشهَ

دِ   خاكِش دفاع كنهَ / اوُ  سي هميشهَ

كُجا   رَت   ايلِ   سَگوَن  /   وا   مالِ   وُ بارشِ

كُجا  رَت بِرنوُ وِشوُ / اوُسووُز  سوُارِش

بِراروُ   جَنگ   آهوُ  دَشت  /  هِي   ها وِ ويرمُ

كَسْ نَمَن  دوُ   قوُشني / سيشوُ   بَميرمِ

يَك  وِ   يَك       هَمهَ      رَتِن   /   دلير     پيايا

 نَمَنهَ    اَسبِ    كَهَر   /   قديمِ    سوُاريا

دِ    اَسبيا     تَعريف     بَكم /      يا    دِ    سوُاروُ

زنيي   سادهَ   داشتيمِ  /  وا دَس بِراروُ

تفَنگيا        بِرنوُ    كوُتاهَ   /    اَسب      سَگلاوُي

شَنگ قطارشوُكِردهَ بي/سي با دِراوُي

دِ   سوُار   سَگوَن    يَكهَ   /   دِ    مينِ         دُنيا

جَنگ تفَنگ شمشير زني /دِمينِ جَنگيا

وَزنهَ    دُمِت      بُريا   /         چَپي   دِ      يالِت

كي كُشتهَ اوُ سوُاركهِ     /  بازوُ  شلالِت

هَر        كَسي     اَسبِ    هَرگَن   / وِمِ  بَرسوُنهَ

تَفنگي پيشكََش مِي يمِ/ وا نصف  حوُنهَ

نَمَنهَ   زوُر     دِ          بازوُمِ   /    تير   دِ   تفَنگمِ

قوُشني دووُرمِ  گريت /سي  دلِ  تَنگمِ

اِ    شاعر   سيمِ     بَنويس   /   دِ     خانِ   خانيا

دِ    غُلام   دِ   مَحسين /  دِ  ديوُو  داريا

نَمَنهَ     چي      غُلامِ    خوُ   /   دِ    ديوِ   خوُنَمِ

داغِ     اوُ     ريشهَ زَيهَ  /  وِ   بَنِ   جوُنمِ

بيا   سِيل  كوُ وي سَرزمي / چوُل  بي  سوُارمِ

كُجا رَت  اوُ گَرميِ /  دَس  دَس  بِرارمِ

صد    پياي   چَن  دِ   شوُ   /     حماسهَ     سازهَ

اَربِهامِ    تَعريف   كنمِ / سالفَش  درازهَ

ارَ   وِ    دلْ   نَشينهَ    شعر   /  پوُزشِ مي هايمِ

هَمَتوُن    دَسِِ    خُدا/  مهِ   مِي سپارمِ

عباس گُوتهَ و امام/ مهِ  عزم جنگ  هام

بَميرِمِ   مهِ   بهترهَ  /  تا    بي   بِرار بام

عزم جنگ گريت عباس/دِ دَس حسينِم

ها  روُوهَ  جنگ وا  يزيد/  او  نورعينِم

رزم  جنگ  پوُشي  امروُ/ عباس دليرِمِ

دوُل دوُل زين بَكنيت/ ها سيش بَميرمِ

عباسِم  رَت  و ميدوُ  /  و   سر  سوُاري

خداوَن    پُشت   پناش /  بَكنش  ياري

اِ  خدا  مهِ  چي   عباس /  بِرار  باشتمهَ

تا  ريشكهَ  يزيدن /  دِ  خاك ورداشتمهَ

كا فرُونكهَ     خيلين   /    هَزار  هَزارهَ

بَميرِم       ام   البنين  /  چَش    انتظارهَ

و   گوُتهَ  چه آسوُنهَ/ و  چَش چه سختهَ

جنگ  اُفتا   دِ  كربلا   /   هُماري   تختهَ

بَكُشيت   تا   بَكُشيِم  /   يهَ    جنگ  دينهَ

بَميرِم  مهِ   سي  زينب /  دلْ  پُر دِ خينهَ

كربلا   پُر    دِ   بلا   /    عباس    رَسيهَ

شمشيرش   بَرق  مي زنهَ /  غلاف كَشيهَ

زينبِم  كل  مي زنهَ  / عباس كنهَ  جنگ

او چنوُ  شمشير زنهَ /   غَم  دوُ  دلِ تنگ

بَميرِمِ  سي  مِرامت   / سي  پيا  داريت

بَميرِمِ  سي  ايثارت /  سي  او جانبازيت

مهِ   دِ  تو  ياد  گريتِم /   رسم   پهلووُني

شهيد    راه    خدا   /   تو    دوُ   جووُني

تا   دُنيا   بر  قرارهَ    /    نوُمت   ديارهَ

سراسر  جهان اسلام   /  سيت  عزا دارهَ

قَد   بلنگ   بازوُ   شلال  /   ستين  دينِم

دوُس  داشتِم  دِ ركاووُت / بَريزه  خينِم

دُنيان     مهِ     نديِم  /   تالي   دِ مييات

مهِ  سيقهَ   قَد  و  بالا  /  او  هَر دو تييات

تو  سَقا  خوُت   علَمدار/ سي  روز تنگِم

قوُشني دووُرت  گريت /  تو   مَرد جنگِم

بَميرِمِ  مهِ سي عباس/خوش  تك وُ تنيا

او چنوُ شمشير  زنهَ  /   چيش  ني دِ دُنيا

عباسِم   تنيا   سوُار /  شمشير    و  دَسش

ايي زمي تكوُ  مي حَرد/ زي  سُم اَسبش

دوُ دهه سيصد  و بيس/  اوُمام  و  دنيا

دِ روُنهَ  اوُو  هرموُشي  /   كَپر   كوُلايا

رُشد  كردم ِآزاد بيمِ /  دوُ دلْ طبيعت

زيني  ساده  داشتمِ  /   مُردم   حقيقت

قوُم   لُر  ايلمِ  سگوند  /    قلي  طايفمِ

مالگهَ كم دِ هَرموُشي /  او  چهَ   مِنافمِ

يادمِ  يا    وا   رفيقوُ /  مَكتب  مي رتيمِ

غَم نيي شاد بيموُ/   وا يك  مي گشتيمِ

او  زموُ    امكان  نيي /  حصير   نشيني

نوُن تنير  اوُو  هَرموُشي/   كوُلا نشيني

يادگيري رقابت  بي/  دِ  مين  كلاسموُ

پاپتي  وا گوردهَ پا  /  جوُمهَ   دردياموُ

كاسِمساَ   گلهَ  وُ  برهَ  /   كلْمهَ     وريسا

گَلي سي خَرّه كاري /  وا   در  حوُمسا

كُجا رَت فال چهل سروُ/ اوشنوُ  نشيني

زمسوُ  نَم نَم   باروُ   /    دوُوار     نشيني

چه گذشت چرخ  زموُ / نَگشت  و كاممِ

حقيقت  پيشهَ  كِردمِ   /   مهِ  دوُ  كلاممِ

دلِ  صاف   نيت  پاك /  بي   دِ  وجوُدمِ

مَردم داري مي كِردمِ/هَر جا حُضورمِ

چي بَكمِدَسْ روزگار/    وا كار وُ بارش

اصالت  دِ  بين  رَ تهَ  /  هيچ ني ديارش

مهِ وياد ايل كوُچ نشي/ ها مي زنمِ زار

مهِ دِ ايي  مالگهَ  دل گير/  ها  بَكنمِ  بار

اِ  دوُسِ   كمياد   بَكوُ   /   تو  دِ   دِيارت

دِ  ياروُ  كَسْ   نَمَنَه  /   كي   بَكهَ   يادت

يك  و  يك   همهَ   رَ تن   /   دلير   پيايا

نَمَنَه    اَسب    كهَر    /     قديم    سوُاريا

نَمَنن   تفنگچي  يا    / دِ   مين  كوُهسار

كوُر    كوُره  د ِ  آسموُ / مياوردِن  وهار

بيا  بَنال    تا    بَناليم   /  سي   روزگاروُ

كَسْ  و   كَسْ سر نِيماره / وايي  دراسوُ

سال و سال  بَدتر  بوُوهَ /   رسم   زموُنهَ

اِ  دوُسِ   سيت    نوشتمِ  /  يادت  بَموُنهَ

ندينمِ  چي   اوسنوُ/ سر  و يك   بياريمِ

حال خَور وا يك بَكيمِ/ غَم دلْ دراريمِ

بَشينيمِ و  دوُور  يك /  چي  اوُسني  موُ

نهَ ايسهَ  كَسي  نِميا /  رَت  با  دِ  تي موُ

صنعت كه دُنيان گريت/زمي دِ بين رَت

غيرت  رَت  بِراري   مُرد/گَپي  كُجا رَت

نهَ ايل  مَن  نهَ  طايفه/ نهَ كَسِ دلْ سوُز

دِ  قوُموُ    كَسي  نَمَن/ رَ تن  و  يهِ  روز

آبادی  داشتیمِ  /    یهِ   چراغ  میشی

کبریت   هم    نَیی  /       چپرا    پیشی

شهندونگ   فتیلهَ /  قوطینش   بوُربی

گُربه دِ تیش رَت/خود و خود کور بی

نفت دَ ئلهَ میاما  /      دوُ   شهر دِسبیل

بیس  لیترش می دَه/  و  دو  قرو پیل

چنوُ   دی   می کِرد  /  چی  لکوُماتی

عصبی   می   بی   /    او    نَنَم   خاتی

زمسوُ سخت بی /  سی   باد    باروُ وهَ

فانوس  که  اوُما  /  گوتیمِ   یهَ  خووُهَ

سوُخت  بِرا بلی  / سی  پخت  نونیامُو

گوشتهَ  بِره  بی /     یهِ    کوُ   نهار  موُ

چَن سال  که   گذشت   / رادیو  اوُما

همه   جمع   بی یمِ  / حوُنهَ   کدخدا

چنوُ گوش می دیمِ/  بیشتر  سی اخبار

آخمِ  سی   اوُسهَ  /     سی او  روزگار

مَدرسهَ    نیی      /    رتیمِ      ملائی

سواد     یاد    کِردیمِ /   ولا  خدائی

زمسوُ     سرد    بی  /    ناشتیمِ   کالهَ

شال   کلاوُو   نیی /  می کِردیمِ  نالهَ

نون گَنم  کم  بی / بیشترش  نوُن  جو

سی   تیکه  میوه /  می کِردیمو   تووُ

زنیی    اوزموُ    /       همش    رقابت

مین    هَر کار  بی  /   داشتیموُ طاقت

توشک   کشتی  مو /     پیشا   خرمنجا

هَر   کَسْ  حَرد زمی  /  فوری وریسا

حسوُو   کتوُو  داشت /   کار دوُ زمونهَ

کُریا     غیرتی    /     کارشوُ     مردوُنهَ

شاعر  تعریف  کوُ /   سی نسل امروزهَ

رفاه      فراووُ     /      بوُوَن   رفوزهَ

گَپ    قُلي   نوُمش     روُئج / دلير  پيايي

زايندهَ    دلِ   زاگرُس /    چه كَد خدايي

بَميرمِ مهِ سي    قُلي  /     دوُازهَ     بِرارهَ

دِ    ايلاق  تا  گرمسير  /   نوُمش      ديارهَ

حالقلي    كُر    گَپ    قلي   /  گَپ بِراروُ

شَنگ قطارِش كِردهَ بي / لوُ چَشمهَ ساروُ

اِ   شاعر    سيم    بَنويس  /  دِ خان خانيا

دِ   ايل   وُ    دِ    طايفهَ   /   قُلي   دِ  راقيا

دِ كمال يا كه اَلماس /  حوُزكهِ جوُ  آرهَ

قاسَمْلي    تا       قيامت   /   سيم  افتخارهَ

دِ   صادق   دِ عزيز خوُ / طهماس بِرارش

دِ    رحيم   اوُ    شَفي   خوُ / دِ اوُ مَرامِش

دِ    جَنگيا    غارَت    بِروُ   /   دلير    پيا يا

دِ    گدا    دِ   حوُز    عَسگر / اوُ كد خدايا

كُجا    رَت    مهدي    قُلي / و اگرُ سوُلِش

نَعرَ كَش   نَعرَ   شير بي / سي دوُ دِموُنِش

كُجا       رَت    اوُ    بِراري  / دِ گرمسيرمِ

كُجا       رَت    دلاوِريا   /   قصهَ      شيرنمِ

كُجا       رَت   پيا   قُلي / وامال وُ بارش

كُجا   رَت   بِرنوُ    وَشوُ / اوُ سوُوزسوُارش

كُجا       رَت    نظر  علي / اَسب سَگلاوي

شَنگ قطارش كِردهَ بي / سي با دِراوي

كُجا رَت اوُ حاجي سِيف / مَجلس نشينمِ

دِ    نمِيا    چنوُ    روُزي  /   وَ   چَش  بِينمِ

كُجا      رَت   كُر چوُ باز  /  دوُسهَ   بِرارمِ

لَطيفمِ   وِ    كُجا    رَت /    غارَت     بيارمِ

ويرهَ   ويرهَ   بَكنمِ / دي   روُز    دلْ گير

داغِ    ايل   مَن   دِ جوُنمِ / بيمهَ زِمي گير

بَنويسمِ     كتووُي    /       تاريخ     بَموُنهَ

وَ    خاطر   نَسل   جديد /   امروُ  جَووُنهَ

قُوم    لُر    ايلمِ    سَگوَند   /  قُلي طايفمِ

مالگَموُ  دِ    هَرموُشي   /   اوُ   چهِ  مِنافَم

ها   وِ    يادمِ    قافلهَ   /   رَت سي عَمارهَ

تَسيارش    سهِ   موُسا بي  /  قاچاق بيارهَ

نهَ ايل    مَن نهَ طايفهَ / نهَ كَسْ دلْ سوُز

دِ  كوُموُ   كَسْ    نَمنَهَ /   رَ تن   وِ   يهِ روُز

يهِ    روُ    يا    كيچهَ   باريك / تَنيا بَميرمِ

قوُرِسوُ   عَباسِ    شوُش   /  مَه   جا  بِيرمِ

نهَ       كُتل نهَ    چاينهَ /   نهَ   بوُو بِراري

نهَ   خوُوَر   نهَ   دالكهِ  /  نَه دَنگ وِراري

وِ ياد    ايل    كوُچ نِشي / ها مِي گريومِ

اِصالت    دِ   بين   رَتهَ   /   مهِ  ها   بَميرمِ

شَكَر   قُلي   سَنگر نِشي / بِرنوُ وِ دَسش

ايي   زمي   تكوُ   مِي حَرد / زير صُم اَسبِش

سِلَحشوُرم   جافري /  ريش وِ سَر شال

نِشسهَ   وِ    قاچ زي /    سوُار   دَس   وِ    يال

عباسقُلي  مَجلس   نِشي /  سُخنگوُ ايلمِ

مَردم    دار    ميموُ    نواز   /   قصهَ    شيرينمِ

ميرزالهَ   بِرار  خوُ /  دِ  مينِ   كوُهسار

حوُمال كُش شمشير وِ دَس /  اوُ دلْ شيردار

آزادمِ    هَمَش آزاد /  كرُ سينهَ تَختي

غيرتي    دلْ    سوُز  ايل / اوُ جَنگجوُ سَختي

بِرارمِ  مَتش   دلير /  سي  روُز    تَنگمِ

دُشمهِ    كه    جُرعت    ناشت /    بيا دِ رَوَ نمِ

مَش     تَتَر   ديپلما سي /  وِ شوُن خانيا

سياسي       اجتماعي /         دِ     مينِ    دُنيا

نَمنَهَ   علي   غُلهَ /      چوُ   باز       وَقتم

دِ     دِهَن    شير   مِي گريت / اوُسي مهِ حَقمِ

پُشتوانمِ    يوُسفَلي  /  سي   روُز   تَنگِم

خَرج    مِي كِرد نِمي پُرسي / دِ وَقت جَنگمِ

راز    دارمِ    عليمِرا   /  دِ  مين  ديارمِ

آخمهِ     سي   ارادَش   /   چي اوُ ني   نارِم

كُجا   رَت   اسفنديار  /    تاريخ      ايلم

ديوُو   روُ   حَرفش   وِ  جا /    سوُختهَ درينمِ

نَمنَهَ     دِ   گَپوُنمِ /   كَسْ   دوُ     سوُاروُ

نَمنَهَ    چوُغا      وِ       شوُ /   روُوهَ    وِ    ديوُو

دِ     كُجا    تَعريف    كنمِ /    همهَ دليريا

يَك   وِ   يَك   همهَ    رَتن   /   كالهَ      سوُاريا

نهَ   دينمِ    نهَ  دِ    مِيا  /    تَنيا    سوُاري

نَمنَهَ   چوُ    پُشت    شوُ   /   سي   مهِ    بِراري

يَك   وِ      يَك     همهَ رَتن / دلير   پيايا

نَمنَهَ       اَسبِ      كَهَر /      قديم         سوُاريا